ფესტივალი 2018 → რეგლამენტი
კინოფესტივალი მედიაში

 

თბილისის მე-18 საერთაშორისო კინოფესტივალის რეგლამენტი
04 - 10 დეკემბერი 2017


1. ორგანიზაცია, მიზანი, თარიღები

თბილისის საერთაშორისო კინოფესტივალის ორგანიზატორია კინოხელოვნების ცენტრი "პრომეთე". ფესტივალის მიზანია, ქართულ და საერთაშორისო აუდიტორიას გააცნოს საუკეთესო ფილმები მთელი მსოფლიოდან, ხელი შეუწყოს სხვადასხვა ქვეყნისა და განსხვავებული კულტურების წარმომადგენლების დაახლოებას, მათ შორის ურთიერთგაგების გაღრმავებას. გარდა ფილმების ჩვენებისა, ფესტივალი აწყობს ვორქშოფებს, ლექციებს, პროფესიულ შეხვედრებსა და დისკუსიებს იმისათვის, რომ ხელი შეუწყოს ახალგაზრდა კინემატოგრაფისტების პროფესიულ დაოსტატებას, მისცეს მათ მსოფლიო კლასის შემოქმედებთან და ექსპერტებთან ურთიერთობის შესაძლებლობა.

თბილისის მე-18 საერთაშორისო კინოფესტივალი გაიმართება 2017 წლის 4-დან 10 დეკემბრამდე თბილისში.

2. სექციები

კინოფესტივალის პროგრამა შემდეგ სექციებს მოიცავს:


- საერთაშორისო კონკურსი - ევროპელი კინორეჟისორების პირველი სრულმეტრაჟიანი მხატვრული ფილმი (წარმოების წელი 2017)
- ევროპული კინოს ფორუმი (ახალი სრულმეტრაჟიანი მხატვრული ფილმები ევროპის ქვეყნებიდან)
- ჰორიზონტები (სრულმეტრაჟიანი მხატვრული ფილმების პროგრამა დანარჩენი მსოფლიოდან)
- დამზადებულია გერმანიაში (ახალი ფილმები გერმანიიდან გოეთეს ინსტიტუტთან თანამშრომლობით)
- ფრანგული კოლექცია
- ქვეყანა ფოკუსში
- რეჟისორი ფოკუსში
- მსახიობი ფოკუსში
- დოკუმენტური მსოფლიო (დოკუმენტური ფილმები მთელი მსოფლიოდან);
- ქართული პანორამა (ახალი ქართული ფილმები)
- ანიმაციური ფილმების ფესტივალი"თოფუზის" საუკეთესო ფილმები
- თბილისის თეატრისა და კინოს უნივერსიტეტის საუკეთესო ფილმები
- სპეციალური ჩვენებები
- ინდუსტრიული დღეები (ვორქშოფები, დისკუსიები, მასტერ-კლასები, ლექციები)
- გამოფენა

3. მონაწილეობის უფლება

- საერთაშორისო კონკურსში მონაწილეობის მიღება შეუძლიათ ევროპელ რეჟისორებს თავიანთი სადებიუტო ნამუშევრით, რომელიც მანამდე არ ყოფილა ნაჩვენები საქართველოში ჩატარებული სხვა კინოღონისძიების ფარგლებში.
- ეროვნულ კონკურსში „ქართული პანორამა" მონაწილეობის მიღება შეუძლიათ ქართველ რეჟისორებს (სტუდენტების გარდა).
- არასაკონკურსო სექციებისთვის შერჩევისას უპირატესობა ენიჭება ფილმებს, რომლებიც არ ყოფილა ნაჩვენები საქართველოში კინოგაქირავების ქსელში ან ქართულ სატელევიზიო არხებზე.

4. ფილმის რეგისტრაცია

გთხოვთ გაითვალისწინოთ, საერთაშორისო კონკურსის სექციის ჩვენებებისთვის მიიღება მხოლოდ DCP ფორმატი.


განაცხადის შევსებული ფორმა (განაცხადის ფორმა შეგიძლიათ გადმოწეროთ ფესტივალის ვებ-გვერდიდან) ფილმის შესარჩევ DVD - ასლთან და სხვა მოთხოვნილ მასალებთან ერთად უნდა გამოიგზავნოს ჩვეულებრივი ფოსტით ან ექსპრეს-ფოსტით ფესტივალის მისამართზე:

კინოხელოვნების ცენტრი "პრომეთე"
თბილისის საერთაშორისო კინოფესტივალი
0112 თბილისი, საქართველო
აღმაშენებლის გამზირი 164

გთხოვთ, გზავნილზე მიუთითოთ: არაკომერციული მიზნებისთვის.

გთხოვთ, ასევე გაითვალისწინოთ, რომ ჩვეულებრივი ფოსტით გზავნილს შესაძლოა 30 დღემდე დრო დასჭირდეს!


5. ფილმების შერჩევა

- ფილმებს არჩევს ფესტივალის შესარჩევი კომისია; ფილმებსა და მონაწილეებს იწვევს ფესტივალის დირექტორი.
- ფილმების შესარჩევი ასლები ინახება კინოფესტივალის არქივში.
- კონკურსისთვის შერჩეული ფილმის წარსადგენად, ფესტივალი მგზავრობის ხარჯებსა და დაბინავებას უზრუნველყოფს სამუშაო ჯგუფის ერთი წარმომადგენლისათვის (რეჟისორი, პროდუსერი, მთავარი როლის შემსრულებელი და ა.შ)

6. ვადები / მნიშვნელოვანი თარიღები

10 აპრილი - ფილმების რეგისტრაციის დაწყება

10 სექტემბერი - საერთაშორისო საკონკურსო სრულმეტრაჟიანი მხატვრული ფილმების რეგისტრაციის ბოლო ვადა

30 სექტემბერი - სექცია „ქართული პანორამის" საკონკურსო ფილმების რეგისტრაციის ბოლო ვადა

15 ოქტომბერი - შერჩევის შედეგების გაცნობა მონაწილეებისთვის

15 ნოემბერი - საჩვენებელი ასლების მოწოდების ბოლო ვადა

4 დეკემბერი - 10 დეკემბერი - ფესტივალის თარიღები

9 დეკემბერი - დაჯილდოების ცერემონიალი

27 დეკემბერი - ფილმების ასლების დაბრუნების ბოლო ვადა


7. ენის ვერსიები და სუბტიტრები

- ფილმების უმეტესობა ნაჩვენები იქნება ორიგინალის ენაზე ინგლისური და ქართული სუბტიტრებით. გამონაკლისის შემთხვევაში შეიძლება ფილმს ქონდეს რუსული სუბტიტრები.
- ფესტივალზე წარმოდგენილ ქართულ ფილმებს ინგლისური სუბტიტრებით უზრუნველყოფს ფილმის პროდიუსერი ან დისტრიბუტორი.

8. ჩვენებები

- თითოეული ფილმი ნაჩვენები იქნება არაუმეტეს ორჯერ.
- სეანსების განრიგს ადგენს ფესტივალის სამუშაო ჯგუფი.

9. საერთაშორისო კონკურსის ჟიური და პრიზები

ჟიურის თავმჯდომარესა და წევრებს არჩევს და იწვევს ფესტივალის დირექტორი. მას შეუძლია დაესწროს ჟიურის სხდომებს, მაგრამ არ აქვს კენჭისყრაში მონაწილეობის უფლება. ჟიური გადაწყვეტილებებს იღებს ღია კენჭისყრის გზით, უბრალო უპირატესობით. პირი, რომელსაც რაიმე კავშირი აქვს კონკურსში მონაწილე ფილმთან, არ შეიძლება იყოს ჟიურის წევრი.

საერთაშორისო კონკურსისთვის დაწესებული პრიზები:

- ოქროს პრომეთე (საუკეთესო ფილმისთვის)
- ვერცხლის პრომეთე (საუკეთესო რეჟისორისთვის)
- ჟიურის სპეციალური პრიზი (ჯილდო შეიძლება მიიღოს მსახიობმა, კომპოზიტორმა, მემონტაჟემ, ოპერატორმა, პროდუსერმა, სცენარის ავტორმა ან მხატვარმა)

კინოინსტიტუციებს/ორგანიზაციებს ან კერძო კომპანიებს შეუძლია სხვა არაოფიციალური პრიზების დაწესება.

თითოეული პრიზი მხოლოდ ერთ გამარჯვებულს გადაეცემა.

10. „ქართული პანორამა" - ჟიური და პრიზები

ეროვნულ კონკურსში მონაწილეობა შეუძლიათ ქართველ რეჟისორებს (სტუდენტების გარდა) მხატვრული, დოკუმენტური და მოკლემეტრაჟიანი ფილმებით. ჟიურის თავმჯდომარესა და წევრებს არჩევს და იწვევს ფესტივალის დირექტორი. მას შეუძლია დაესწროს ჟიურის სხდომებს, მაგრამ არ აქვს კენჭისყრაში მონაწილეობის უფლება. ჟიური გადაწყვეტილებებს იღებს ღია კენჭისყრის გზით, უბრალო უპირატესობით. პირი, რომელსაც რაიმე კავშირი აქვს კონკურსში მონაწილე ფილმთან, არ შეიძლება იყოს ჟიურის წევრი.

ეროვნული კონკურსისთვის დაწესებული პრიზები:

- პრომეთე საუკეთესო მხატვრული ფილმისთვის
- პრომეთე საუკეთესო დოკუმენტური ფილმისთვის
- პრომეთე საუკეთესო მოკლემეტრაჟიანი ფილმისთვის


კინოინსტიტუციებს/ორგანიზაციებს ან კერძო კომპანიებს შეუძლია სხვა არაოფიციალური პრიზების დაწესება.

თითოეული პრიზი მხოლოდ ერთ გამარჯვებულს გადაეცემა.


11. ტრანსპორტირება და ასლებზე პასუხისმგებლობა

- ფილმის ასლები თბილისში ფესტივალის ოფისს უნდა მიეწოდოს არაუგვიანეს 15 ნოემბრისა.
- ქართველმა პროდუსერებმა და დისტრიბუტორებმა თავიანთი ასლები საკუთარი ხარჯით უნდა მოიაწოდონ ფესტივალის ოფისს.
- ტრანსპორტირების ღირებულების დაფარვის პირობები დამატებით შეთანხმდება უცხოელ პროდუსერებთან/დისტრიბუტორებთან.
- ფესტივალი ასლებზე პასუხისმგებელია გადამზიდველისგან მისი მიღების მომენტიდან (იმპორტირებისას) გადამზიდველისთვის მისი გადაცემის მომენტამდე (ექსპორტირებისას). ასლის დაზიანების ან დაკარგვის შემთხვევაში ფესტივალის პასუხისმგებლობა შემოიფარგლება ახალი ასლის დამზადების ღირებულებით, სტანდარტული ასლის დამზადებისთვის არსებული ლაბორატორიული ფასების შესაბამისად.
- ასლის დაზიანების შესახებ ფესტივალის ოფისს უნდა ეცნობოს წერილობით მისი დაბრუნებიდან 1 თვის განმავლობაში, სანამ ის სხვაგან იქნება გამოყენებული. ასლის მდგომარეობასთან დაკავშირებით არსებული პრეტენზიები სადაზღვევო კომპანიის მიერ მოწოდებული ცნობის საფუძველზე შეფასდება.

12. სხვა საკითხები

- ფესტივალში მონაწილეობის მიღება გულისხმობს მოცემული რეგლამენტის აღიარებას.
- მონაწილეობაზე თანხმობის განცხადების შემდეგ მოწვეული ფილმი აღარ მოიხსნება ფესტივალის პროგრამიდან.
- შემთხვევები, რომლებიც არ არის ასახული რეგლამენტში, განხილული იქნება საერთაშორისო წესების შესაბამისად.