ჟიური 2018
ფესტივალი2018 → ჟიური 2018
კინოფესტივალი მედიაში
საერთაშორისო კონკურსის ჟიური
                                                                          ჟიურის თავმჯდომარე

   

რაიმუნდას ბანიონისი

რაიმუნდას ბანიონისი დაიბადა 1957 წელს, პანევეჟისში (ლიეტუვა), მსახიობების - დონატას ბანიონისის და ონა ბანიონინიენეს ოჯახში. სცენაზე პირველად სამი წლის ასაკში მოხვდა, როდესაც შექსპირის „მაკბეტში" (რეჟ. იუოზას მილტინისი) ეპიზოდური როლი შეასრულა. ამის შემდეგ არაერთ საბავშვო სპექტაკლში ითამაშა და მონაწილეობდა მასობრივ სცენებშიც. თეატრში მთავარი როლი ითამაშა ჟან ანუის პიესაში „მგზავრი ბარგის გარეშე". მან მთავარი როლები შეასრულა ფილმებში: „გულადი ხუთეული" და „თხუთმეტი გაზაფხული" და ეპიზოდური როლი ა. ტარკოვსკის „სოლარისში". 1980 წელს დაამთავრა მოსკოვის საკავშირო კინემატოგრაფიის ინსტიტუტი

„ვგიკი", სადაც კინორეჟისურას ლევ კულიჯანოვისა და ტატიანა ლიოსნოვას ჯგუფში სწავლობდა. 1980 წლიდან რაიმუნდასი ლიეტუვას სახელმწიფო კინოსტუდიაში მუშაობდა კინორეჟისორად, ხოლო 1991 წლიდან მუშაობა დაიწყო კერძო კინოკომპანია „ლიტნეკში". ის, ასევე, სხვადასხვა თეატრსა თუ ტელევიზიაში მუშაობს. მის ყველაზე დასამახსოვრებელ ფილმთაგან საგულისხმოა: „ჩემი პატარა ცოლი" (1985), „ბავშვები სასტუმრო ამერიკიდან" (1990) და „ჯაზი" (1992).

  

ნიმა ჯავიდი 

ნიმა ჯავიდი ირანელი სცენარისტი და რეჟისორია, რომელიც 1980 წელს დაიბადა.
ფილმებზე მუშაობა 18 წლის ასაკში, მოკლემეტრაჟიანი ფილმის „მარათონის ჩემპიონი" (2000) გადაღებით დაიწყო. მისმა პირველმა სრულმეტრაჟიანმა ნამუშევარმა „მელბურნი" (2014), რომელმაც ვენეციის კინოფესტივალის კრიტიკოსების კვირეული 2014 წელს გახსნა, 60-ზე მეტი ფესტივალი მოიარა მსოფლიოს მასშტაბით, მათ შორის: ტოკიოს, სტოკჰოლმის, ციურიხის, ქაიროს, მარ-დელ-პლატას, შანხაის, სტამბოლის, დუბლინის და ა.შ. ამ პირველი ფილმისთვის მან 14 საერთაშორისო ჯილდო მიიღო, მათ შორის: ჯილდო საუკეთესო ფილმისთვის ქაიროს კინოფესტივალზე (2014), საუკეთესო სცენარისთვის სტოკჰოლმის კინოფესტივალსა და აზიურ-წყნარი ოკეანის ქვეყნების კინოდაჯილდოების ცერემონიალზე (2014) , საუკეთესო რეჟისურისთვის, სცენარისთვის და ახალგაზრდა ჟიურის პრიზი ხიხონის კინოფესტივალზე (2014) და ა.შ.
ის აზია-წყნარი ოკეანის რეგიონის კინოაკადემიის წევრია, ხოლო 2016 წელს ხიხონის 54-ე კინოფესტივალის ჟიურის წევრი იყო.
ამჟამად ნიმა ჯავიდი მუშაობას ასრულებს თავის მეორე სრულმეტრაჟიან ფილმზე „ზედამხედველი" (2018).

 

სელინ ნუსი

ისტორიაში მაგისტრის ხარისხის მიღების შემდეგ, სელინ ნუსი 10 წელი სწავლობდა კინოპროდუქციის საქმეს კომპანია Roche Productions-ში. აქ მას საშუალება ქონდა, არაერთ სახელგანთქმულ კინოდოკუმენტალისტთან ეთანამშრომლა, როგორებიცაა ნინო კირთაძე, პაველ ლუნგინი, უილიამ კარელი და პატრიკ ჟედი. 2007 წელს მან მუშაობა დაიწყო კომპანია Zadig Productions-ში ჯერ როგორც კინოწარმოების მენეჯერმა, შემდეგ კი - როგორც პროდიუსერმა. ის, როგორც კომპანიის პარტნიორი, 2014 წელს ის კომპანიის გენერალურ დირექტორად დაინიშნა. სელინი აქტიურად თანამშრომლობს პოლ როზენბერგთან. მათი პროდიუსირებით ოცდაათი ფილმი გამოვიდა, სადაც უპირატესობა ენიჭება გეოპოლიტიკური, ისტორიული და კულტურული საკითხების მიმართ ავტორების ხედვას. მისი ერთ-ერთი უკანასკნელი ნამუშევარია რუთ ზილბერმანის ფილმი „მეზობლები", რომელიც კვლავ განაგრძობს კინოფესტივალებზე ჯილდოების მოპოვებას.

 

კანაკო ჰაიაში

ტოკიოს FILMeX-ის საერთაშორისო კინოფესტივალის ყოფილი დირექტორი, ამჟამად ფრილანსერი. 1986-დან 1998 წლამდე იყო კავაკიტას სახელობის კინოინსტიტუტის გენერალური დირექტორი. მისი წყალობით, არაერთი იაპონური ფილმი წარადგინეს საერთაშორისო კინოფესტივალებზე და მისივე მხარდაჭერით, საზღვარგარეთ იაპონური კინოს არაერთი რეტროსპექტივა გამართა. ვენეციის კინოფესტივალზე (1999-2000) აზიური ფილმების სელექციაზე მუშაობდა. მოგვიანებით, ფორუმის სექციის კონსულტანტი იყო ბერლინის კინოფესტივალზე.
2001 წლიდან 2018 წლის მარტამდე კანაკო ჰაიაში ტოკიოს ფილმექსის საერთაშორისო კინოფესტივალის დირექტორი გახლდათ. 2010 წლიდან პროექტ „ტოკიოს ახალი აღმოჩენების" კომისიის თავმჯდომარედ მუშაობდა, რომელიც ბერლინის კინოფესტივალის „ახალი აღმოჩენების" პროგრამასთან თანამშრომლობით შეიქმნა. ის იყო ისეთი კინოფესტივალების ჟიურის წევრი, როგორებიცაა მონრეალის, ტურინის, ჰავაის, ბერლინის, ლოკარნოს, ჰონგ კონგის, კარლოვი ვარის, ტაიბეის, სახალინის, სან პაულუს, ვენეციის და პუსანის საერთაშორისო კინოფესტივალები.
2012 წელს, პუსანის საერთაშორისო კინოფესტივალზე მას კორეული კინოჯილდო გადაცეს.

  

არჩილ ქიქოძე 

არჩილ ქიქოძე დაიბადა 1972 წლის 9 ივლისს თბილისში. 1989-1992 წლებში სწავლობდა თბილისის სახელმწიფო უნივერსიტეტში აღმოსავლეთმცოდნეობის ფაკულტეტზე. 1992-1995 წლებში თბილისის სახელმწიფო თეატრისა და კინოს ინსტიტუტში კინოსაოპერატორო ფაკულტეტზე. 1995-1999 წლებში თბილისის სახელმწიფო თეატრისა და კინოს ინსტიტუტში კინოდრამატურგიის ფაკულტეტზე (ერლომ ახვლედიანის სახელოსნო). 21 წლის ასაკში დაწერა პირველი მოთხრობა და მალევე გამოუშვა მოთხრობების პირველი კრებული „ბიჭები". იგი მოთხრობების ხუთი და ესეების ერთი კრებულის ავტორია. მიღებული აქვს სხვადასხვა ლიტერატურული ჯილდოები, მათ შორის: ლიტერატურული პრემია „გალა" (მოთხრობების კრებული „მყუდრო", 2008), ლიტერატურული პრემია „საბა" (მოთხრობების კრებული „ჩიტის და კაცის ამბავი", 2014), ლიტერატურული პრემია „ლიტერა" წლის საუკეთესო რომანი, ილიას უნივერსიტეტის პრემია საუკეთესო რომანისთვის (რომანი „სამხრეთული სპილო", 2017). არჩილ ქიქოძე არის ფილმის Tbilisi, I love you (ნოველა „ქორწილი", რეჟისორი: ლევან ღლონტი) ერთ-ერთი სცენარის ავტორი (2014). ასევე დიმიტრი მამულიას ფილმის „უცხო" და ილო ღლონტის ფილმის „რატომ ვართ ერთად" სცენარების თანაავტორი. როგორც მსახიობს განსახიერებული აქვს ივას როლი ლევან კოღუაშვილის ფილმში
„შემთხვევითი პაემნები" (2013) და თაზოს როლი ნინო ჟვანიას ფილმში „აღლუმი" (2018).

ეროვნული კონკურსის ჟიური

 

ევა პეიდრო

კინოკრიტიკოსი, ფილოლოგი, კულტურის საკითხების მიმომხილველი და მწერალი, ფიპრესის და ფედეორას წევრი. 2003-2014 წლებში ესპანური კულტურის და გართობის ინდუსტრიის შესახებ ჟურნალის, Cartelera Turia-ს ყოველკვირეული რუბრიკის ავტორი - კინოკრიტიკოსი და მესვეტე („მგრძნობიარე მატერია", კინოსიახლეების შესახებ და „მარტო სიბნელეში" - მთელი მსოფლიოდან კინოფესტივალების შესახებ რეპორტაჟების ავტორი). ის არის არტ-კატალოგებისა და ჟურნალების სტატიების ავტორი, სხვადასხვა დროს იყო საერთაშორისო კინოფესტივალების (კანი, სან სებასტიანი, ვენეცია, კარლოვი ვარი და ა.შ.) ჟიურის წევრი. მან, ასევე, დაწერა ორი საბავშვო რომანი „საიდას არდადეგები" და „საიდას განძი", რომლებიც ლიტერატურული პრემიებით დააჯილდოვეს.
ევა პეიდრო არის კულტურისა და გართობის ინდუსტრიის შესახებ ონლაინ ჟურნალის, El Hype-ის დირექტორი და დამფუძნებელი.

 

ერიკა გრეგორი

ლონდონში, მიუნხენსა და ბერლინში ერიკა გრეგორი  ისტორიას, ფილოსოფიას, გერმანულ და ბრიტანულ ლიტერატურას სწავლობდა. 1963 წელს მეუღლესთან, ულრიხ გრეგორთან ერთად დაარსა ასოციაცია,,გერმანული კინემათიკის მეგობრები’’. კინოთეატრ ,,არსენალის’’დაარსების დღიდან ერიკა გრეგორი კინოჩვენებების ორგანიზატორი და კინოპროგრამების შემდგენელი იყო. იგი არის კინოფესტივალების ორგანიზატორი და კოორდინატორი, მრავალი ჟიურის წევრი, აგრეთვე კინოდაფინანსების კომისიის წევრი. 1971-2004 წლებში ის ბერლინის კინოფესტივალის ახალი კინოს საერთაშორისო ფორუმის შესარჩევი კომიის წევრი იყო. 1980-90 წლებში ხელმძღვანელობდა რეტროსპექტივებსა და  სხვადასხვა ეროვნულ ეროვნულ კინოპროგრამებს. მეუღლესთან, ულრიხ გრეგორთან ერთად გამოსცემს კატალოგებს, წიგნებსა და პერიოდულ სერიას ,,კინემათიკის რვეულები’’. 2010 წელს ერიკა და ულრიხ გრეგორებს გადაეცათ ბერლინის საერთაშორისო კინოფესტივალის პრიზი, ,,კამერა’’ - კინემატოგრაფში შეტანილი წვლილისთვის.


ულრიხ გრეგორი

კინოისტორიკოსი და კინოკრიტიკოსი, თბილისის კინოფესტივალთან მრავალწლიანი მეგობრობა და თანამშრომლობა აკავშირებს. კინოისტორიის პროფესორი ბერლინის კინოსა და ტელევიზიის გერმანულ აკადემიაში და ბერლინის ხელოვნების უნივერსიტეტში. კინოსა და ვიდეოარტის დამოუკიდებელი ინსტიტუტის „არსენალის" ერთ-ერთი დამაარსებელი და საორგანიზაციო ჯგუფის ხელმძღვანელი. ბერლინალეს ახალი კინოს საერთაშორისო ფორუმის დირექტორი 2001 წლამდე. 1981 წლიდან 2000-მდე ულრიხ გრეგორი მორიტც დე ჰადელნთან ერთად ბერლინის კინოფესტივალის დირექტორი იყო. მიჩნეულია მსოფლიოს ერთ-ერთ მოწინავე კინოკრიტიკოსად. მეუღლესთან, ერიკა გრეგორთან ერთად, მას კურატორული საქმიანობით მნიშვნელოვანი წვლილი აქვს შეტანილი კინოს განვითარების საქმეში. 2010 წელს ერიკა გრეგორთან ერთად გადაეცა ბერლინის საერთაშორისო კინოფესტივალის პრიზი, „კამერა" - კინემატოგრაფში შეტანილი წვლილისთვის. ულრიხ გრეგორი მუდმივად თანამშრომლობს ტელევიზიასა და რადიოსთან, მისი სტატიები რეგულარულად ქვეყნდება საერთაშორისო კინოჟურნალებში (Nuovo Cinema, Cinema 56).